Их эрдэмтэн Галилео Галилейн шарилыг 1735 онд Италийн Флоренцын цогчин дуганд шилжүүлэх үеэр баруун гарынх нь гурван хуруу, шүд, нурууны яс нь алга болсон аж. Удалгүй нэг хуруу, нурууны яс нь олдсон. Өдгөө долоовор хуруу нь Флоренцын Шинжлэх ухааны түүхийн музейд, нурууны яс нь түүний багшилж асан Padua их сургуульд хадгалагдаж байдаг. Үлдсэн хоёр хуруу, шүд нь Италийн нэгэн тайжийн гэрт үе дамжин хадгалагдаж байгаад 1905 оны орчим сураггүй алга болсон юм. Саяхан эдгээр зүйлс олдсон гэж Шинжлэх ухааны түүхийн музейн захирал Паоло Галуцци мэдэгдэв. Ойрмогхон болсон дуудлага худалдаан дээр модон хайрцагт хийж хүрэн шилэн вааранд залсан ясыг худалдан авсан хүн тус музейн ажилтнуудад хандан юу болохыг нь тодруулах хүсэлт тавьснаар бүх зүйлийн учир тайлагдсан байна.
Дэлхий бол ертөнцийн төв биш, нарыг тойрон эргэдэг гариг гэсэн үнэнийг нээж, олон нийтэд дэлгэснийхээ төлөө сүм хийдийн хавчлагад өртөж байсан их эрдэмтэн Галилео Галилей 1642 онд өөд болсон юм. Өөд болсноос нь хойш 351 жилийн дараа буюу 1993 онд Ромын пап Иан Павел “дэлхий нарыг тойрон эргэдэг” нь үнэн болохыг албан ёсоор хүлээн зөвшөөрч, их эрдэмтнээс уучлал гуйсан юм. Үхэр тэргээр явдаг тул үнэн их л хожуу ирдэг аж.
No comments:
Post a Comment